Қарағандыда 36 жастағы ер кісі мектеп оқушысын зорламақ болды деген күдікпен ұсталды.
Оқиға 24 шілде күні болған. 51 жастағы жергілікті тұрғын полицейлерге арызданып келген. Өз шағымында белгісіз азамат қызын зорламақ болғанын көрсеткен. Оның айтуынша, ер кісі аулада жүрген 13 жасар қызының қолынан ұстап, адам жоқ жерге сүйреп әкеткен. Кейін арам пиғылын іске асырмақ болғанда оқушы қатты шыңғырып, айналасындағыларды көмекке шақырған. Ал қаскөй осы сәтте қаша жөнеліпті.
Облыстық Полиция департаментіндегілер күдіктінің жеке басын анықтау және оны ұстау мақсатында іздестіру шараларын жүргізген.
«Күдікті аулалардың бірінен ұсталды. Ол — 36 жастағы ер азамат. Аталған факт бойынша Қылмыстық кодекстің 121-бабы, 4-бөлігімен (Жас балаға қатысты жасалған сексуалдық сипаттағы зорлық-зомбылық әрекеттері) сотқа дейінгі тергеу басталды. Күдікті уақытша ұстау изоляторына қамалды. Терегу амалдары жүргізіліп жатыр»,-деді ведомстадағылар.
Айта кетейік, егер күдіктінің кінәсі дәлелденсе, ол 20 жылдан бастап өмір бойына дейін бас бостандығынан айыру жазасын арқалауы мүмкін.
