33 жастағы Күлжайна Қалдарова төрт баланың анасы бола тұра, «Бастау Бизнес» жобасы аясында кәсіпкерлік негіздерін оқып, тиісті сертификат алды.
Ол 2022 жылдың 1 сәуірі мен 14 сәуірі аралығында қабылданған қайтарымсыз мемлекеттік грантқа өтінім беріп, кейін 26-28 сәуір аралығында өткен комиссия отырысында бизнес-жоспарын қорғады. Жоба мақұлданғаннан кейін көп балалы анаға грант қаражаты бөлінді. Күлжайна көп ұзамай алған ақшасына бизнесіне қажетті құрал-жабдықтарды сатып алып, жұмысқа кірісті.
«Қазір мемлекет өз кәсібін ашқысы келетін немесе бар кәсіпті дамытқысы келетіндерге түрлі жағдай жасап жатыр. Қайтарымсыз мемлекеттік грант – соның дәлелі. Бұл шағын кәсіп ашуға қаражаты жоқтар үшін айтарлықтай көмек. Мәселен, мен мемлекеттің арқасында кәсібімді бастағаныма өте қуаныштымын. Бұл гүлденудің бастауы екеніне сенімдімін», — дейді грант иегері.
Айта кету керек, мемлекеттік қайтарымсыз гранттың бірінші кезеңіне 400-ден астам өтініш (онлайн) түскен. Оның 336-сы қаралды. Сайып келгенде, 226 бизнес-жоспарды комиссия мақұлдаса, 110-ы кері қайтарылды.
