Астанада ішімдік ішіп алған пәтер ұрысы оңбай ұсталды. Оңай олжаны қолды еткен ол лифтідегі бейнебақылау камерасына түсіп қалған. Бұл туралы Polisia.kz жазды.
Сарыарқа ауданының полицейлеріне елорда тұрғыны пәтерінен жеке заттарының жоғалғаны туралы өтінішпен жүгінген. Криминалдық полиция қызметкерлері жедел-іздестіру іс-шаралары барысында Ақмола облысының 41 жастағы тұрғынын анықтады. Оның Дүкенұлы көшесіндегі көппәтерлі үйдің маңайында жиі болатыны және жан-жағын қарастырып жүргені анықталды.
Күндізгі уақытта жеткілікті мөлшерде ішімдік ішкен ер адам кіреберіске кіріп, құлыпталмаған есіктерді іздеп, тұтқаларын тарта бастаған. Пәтерлердің бірінде иелері жоқ екеніне көз жеткізген ол құлыпты бұзу арқылы екі ер адамның күртешесін, қысқы кроссовкаларын және пәтер кілттерін ұрлап кеткен. Аталған факті бойынша Қылмыстық кодекстің 188-бабы (Ұрлық) бойынша сотқа дейінгі тергеу амалдары жүргізілуде. Заттай дәлелдемелер тәркіленді.
