Талдықорғанда 3 жасар бүлдіршіннің өлімі бойынша қылмыстық іске сот нүкте қойды. Облыстық соттың баспасөз қызметінің хабарлауынша, жерілікті тұрғын бала өліміне кінәлі деп танылған. Оған 10 жылға бас бостандығынан айыру жазасы тағайындалды. Сотталушыға жазасын қылмыстық-атқару жүйесінің орташа қауіпсіз мекемесінде өтеу белгіленді.
Еске салсақ, 12 қыркүйекте Талдықорғандағы аурухананың бірінде бас жарақатын алған 3 жасар бала қайтыс болды. Оның өліміне қатысы бар деген күдікпен 23 жастағы жергілікті тұрғын ұсталып, қамауға алынған болатын. Ол бұған дейін бала күтушісі болған. Полицейлер бұл оқиға бойынша Қылмыстық кодекстің 106-бабы 3-бөлігімен (абайсызда жәбірленушінің өліміне әкеп соққан денсаулыққа қасақана ауыр зиян келтіру) іс қозғады.
