26 мамыр күні жергілікті уақытпен сағат 17:00-де Шымкент қаласындағы Арбатта (Бейбітшілік көшесі 4-6) «Халық заңгері» акциясы басталады. Жалпыреспубликалық шара тек үшінші мегаполис емес, Қазақстанның барлық ірі қалаларында өтеді.
Бұл туралы Сыбайлас жемқорлыққа қарсы күрес агенттігінің Шымкент қаласы бойынша департаментіндегілер хабарлады. Акцияның мақсаты – халықтың құқықтық сауаттылығын арттыру және тегін заң көмегін көрсету. Кез келген азамат еліміздің заң қоғамдастығындағы ең үздік өкілдерден тегін қажетті консультация ала алады. Олардың арасында белгілі адвокаттар, нотариустар, прокурорлар, тергеушілер, сот орындаушылары, мемлекеттік органдардың өкілдері және басқалары бар.
«Халық заңгері» акциясын өткізу дәстүрге айналды және қарапайым қазақстандықтар алғысын білдіруде. 2016-2022 жылдар аралығында акцияға 7000-нан астам үздік сарапшы және мемлекеттік органдардың шешім қабылдай алатын құзыретке ие өкілдері қатысты. Құқықтық көмекке жүгінген 150 000-нан астам азамат консультация алды.
Акция форматының Қазақстанда ғана емес, сондай-ақ әлемде ауқымы мен географиясы бойынша теңдесі жоқ.
