Түркістан облысы Келес ауданында 11 баласы бар әйел атаулы әлеуметтік көмек (АӘК) алудан бас тартты. Бұл туралы алтын құрсақты ана облыс әкімі Дархан Сатыбалдының аудан халқымен кездесуі кезінде айтты.
Әкімдік баспасөз қызметінің хабарлауынша, кездесуде Біртілек ауылдық округі Аққорған елдімекенінің тұрғыны, көпбалалы ана егін егіп, өз кәсібін дөңгелету үшін конкурс арқылы жер алуға ниеті барын жеткізген.
«Ауыл аманаты» бағдарламасына АӘК алушылар да қатыса алады деп естідім. Маған АӘК-тің керегі жоқ. Одан да осы бағдарламамен 2 га жер алып, егін егуді қолға алмақпын. Аллаға шүкір, 10 қызым, 1 ұлым бар. Өз-өзімді бағып кетемін», – деді көпбалалы ана.
Алтын құрсақты ананың бұл сөзін естіген облыс әкімі оған риза болып, қажет болса несие берілетінін алға тартты.
«Батыр анамызға бір қол соғып қойыңыздар. Еңбектенем деген адамға мүмкіндік көп. Міне, 11 баласы бар, АӘК керек емес деп отыр. Жер мәселесіне келсек, «Ауыл аманаты» бағдарламасын жүзеге асыру бойынша сізді кооперативке мүше етіп кіргізіп, жергілікті әкімдік арқылы жерді пайдалануға беруге болады. Өзіңіз өңдейсіз. Қажет болса, сізге 2,5% несие де бере аламыз», – деді облыс әкімі.
