Қарағанды қаласы Әлихан Бөкейхан аудандық соты Қарағанды облысы бойынша Мемлекеттік мүлік және жекешелендіру департаментінің басшысы Д. Хамзин мен осы департаменттің қаржылық қамтамасыз ету бөлімінің басшысы К. Қашқынбаевқа қатысты үкім шығарды.
Сот үкіміне сәйкес, Д. Хамзин Қазынашылық департаменті ғимаратын ағымдағы жөндеуден өткізу бойынша орындалған жұмыстар актісіне қол қойғаны үшін 1 миллион теңге көлемінде пара алғаны үшін кінәлі деп танылды.
Бұдан бөлек, Хамзин мен Қашқынбаев қызмет бабын асыра пайдаланып, өздерімен үлестес тұлғаларды жалған жұмысқа орналастыру арқылы 2,5 миллион теңге бюджет қаражатын жымқырған.
Сот үкімімен Д. Хамзинге 55 миллион теңге, К. Қашқынбаевқа 25,4 миллион теңге мөлшерінде айыппұл салынды.
Сондай-ақ, екеуіне де мемлекеттік қызметте және квазимемлекеттік секторда жұмыс істеуге өмір бойына тыйым салынды.
Айта кетейік, сот үкімі әлі заңды күшіне енген жоқ.
