Ақмолада өртенген көліктің салонынан табылған мәйіттің жеке басы анықталды. Polisia.kz жазуынша, 15 қарашада Көкшетау қаласының полиция басқармасына облыс орталығының 33 жастағы тұрғынынан арыз келіп түскен. Оның айтуынша, өзіне тиесілі Mercedes МL автокөлігін белгісіз біреу ұрлап кеткен. Залал сомасы 3,2 млн теңгені құраған. Осы факті бойынша Қылмыстық кодекстің 200-бабы 3-бөлігі (Көлікті заңсыз иемдену) бойынша сотқа дейінгі тергеу басталды.
Mercedes МL автокөлігі Әуезов – Подгорная көшелерінің қиылысында Красный Яр бағытында өртеніп кеткен күйінде табылды. Жүргізуші бетон аялдамаға соғылып, сол жерде көз жұмған. Криминалистикалық есепке алу базасы бойынша қаза тапқан адамның жеке басы анықталды. Ол бұрын қылмыстық жауапкершілікке тартылған, Нұрлы Көш кентінің 23 жастағы тұрғыны болып шықты.
