Шымкентте сұлулық салонына белгісіз ер адам кіріп, кассада тұрған 300 мың теңге ақша мен ақ түсті сөмкенің ішінде болған жалпы құны 300 мың теңгені құрайтын алтын бұйымдарды жымқырып кеткен. Бұл туралы полицияға кәсіп иесі арызданған. Оның шағымын полицейлер Қылмыстық кодекстің 188-бабы 1-бөлігімен (Ұрлық) сотқа дейінгі тергеп-тексерудің бірыңғай тізіліміне тіркеді.
Жедел-іздестіру жұмыстары нәтижесінде күдікті Жамбыл облысы аумағынан ұсталды. Ол сол өңірдің 35 жастағы тұрғыны болып шықты, жұмыссыз. Бұрын-соңды сотты болмаған.
Қалалық Полиция департаментінің мәліметінше, тергеу барысында ұсталған азамат заңсыз әрекетке қаражаттан қысылғандықтан барғанын және бұл үшін өкінетінін жеткізді.
Қазіргі уақытта күдіктінің алған ақшаны өз қажеттілігіне жаратып жібергені анықталды. Тергеу амалдары жүргізілуде.
