Екібастұзда целлофанға оралған «мәйіт» таңғы уақытта серуендеуге шыққан әйелдің зәресін алды. Жергілікті тұрғын таңғы сағат 7-лер шамасында итін аулада серуендетуге шыққан екен. М.Әуезов көшесіндегі үйдің ауласында ешқандай тіршілік белгісі жоқ, целлофанға оралған ер адамды көрген. Көзіне мәйіт болып көрінген келіншек полицейлерге хабарлауға асыққан. Алайда қолында ұялы телефоны болмағандықтан жақын маңдағы автотұрақ күзетшісіне өтініш айтыпты. Оқиға орнына полицейлер шұғыл жеткен. Тәртіп сақшылары целлофанды ашып қарағанда, ішіндегі «мәйіт» деген ер кісі орнынан тұрып, қашан жөнелген.
Павлодар облыстық Полиция департаментінің мәліметінше, ер кісі бір күн бұрын спирттік ішімдік көп ішіп қойып, үйіне жете алмай қалған екен. Содан аулада ұйықтай салуды жөн санапты. Кенеттен жаңбыр жауып кеткен соң айналада жатқан целлофанды тауып алып, оны үстіне жапқан күйі ұйқыға кеткен.
