Алматы қаласында түнгі сағат 12-лер шамасында жанармай құю бекетіне қарақшылық шабуыл жасалды. Бетперде киген екі адам қолдарында шеге суырғыш пен балта ұстап, жанар-жағармай құю бекетіне баса-көктеп кірген. Содан кассир мен күзетшіні артқы бөлмеге қамап, қызметкерлердің ұялы телефондары мен кассадағы 100 мың теңгені ұрлап кеткен.
«Шабуылдаушылардың барлық әрекеті бейнебақылау камераларына жазылып қалған. Күдіктілер сол күні анықталып, қамауға алынды. Олар 1999 және 2000 жылы дүниеге келген жас жігіттер. Бұл дерек сотқа дейінгі тергеудің бірыңғай тізіліміне Қылмыстық кодекстің 191-бабы 2-бөлігі бойынша тіркелді», – деді Медеу аудандық ПБ қарасты полиция бөлімінің бастығы Елнұр Құдіретбаев.
Күдіктілер Алматыға жұмысқа орналасу үшін келген екен. Оңай ақша табу үшін осындай жолға түскен. Екеуі де уақытша ұстау изоляторына қамалды.
