Қарағандыда алаяқтық фактісі бойынша кезекті қылмыс ашылды. Бұл жолы полицияға 31 жастағы азамат жүгінген. Баспана алуды көздеген ол оңай жолды іздеген. Содан өзін әкімдік қызметкерімін деп таныстырған ер кісімен хабарласқан. Бейтаныс адам өзінің мүмкіншіліктерін айтып, қысқа мерзімде көмектесетініне уәде етіп көндірген. Ол қызметі үшін 2 млн 300 мың теңге беру керектігін айтқан. Алаяқтың құрғақ уәдесіне сеніп қалған жәбірленуші айтқан соманы санап берген. Алайда ақшаны алғаннан кейін делдал байланысын тоқтатқан.
Облыстық Полиция департаментіндегілер көз ұзамай күдікті ұсталғанын хабарлады. 33 жастағы ер кісі өз кінәсін мойындаған.
Сотқа дейінгі тергеу барысында күдіктінің Қылмыстық кодекстің 190-бабы (Алаяқтық) бойынша тағы бір ұқсас қылмысқа қатысы бар екені анықталыпты. Бұл жолы ұсталған азамат дәл осындай құрғақ уәдемен 32 жастағы қала тұрғынынан 1 млн 100 мың теңге алған екен.
