Астанада пәтерін жөндетпек болған жас жігіт шабуылдың құрбаны болды. 19 жасар тұрғын полицияға арызданған. Жәбірленушінің айтуынша, ол пәтерін жөндеу үшін құрылысшы жалдаған. Алайда белгілі бір себеппен жөндеу жұмыстары аяқталғаннан кейін тапсырыс беруші құрылысшыға ақысын бермеген. Бұл туралы Polisia.kz жазды.
Көрсеткен қызметі үшін ақысын ала алмаған жұмысшы агрессивті түрде әрекет еткен. Жігітті қорқытып, оны скотчпен байлаған. Кейін IРhone 12 Pro Max ұялы телефонын және банк картасын алып кеткен. Жедел-іздестіру іс-шаралары барысында полицейлер 41 жастағы күдіктіні ұстады. Ол ұрланған телефонды ломбардқа өткізіп үлгеріпті. Полиция ер кісінің бұған дейін де ұрлық қылмысы үшін жауапқа тартылғанын анықтады.
Қазіргі таңда тонау фактісі бойынша сотқа дейінгі тергеу жүргізілуде. Күдікті уақытша ұстау изоляторына қамалды.
