Түркістан облысы Сарыағаш ауданында ауыл тұрғыны өзінің анасы мен әпкесін ұрып-соққан. Оқиға Еңкес ауылындағы жеке тұрғын үйде түнгі уақытта болған.
Үйіне ішімдік ішіп келген ер кісі анасы мен әпкесін соққыға жығып, денсаулықтарына қасақана жеңіл зиян келтірген. Оған Сарыағаш ауданының әкімшілік істер жөніндегі мамандандырылған сотында Әкімшіліқ құқықбузышылық туралы кодекстің 73-1-бабының 1-1-бөлігімен айып тағылды. Ол өз кінәсін мойындап, мұндай қадамға мас халде барғанын жеткізген және шынайы өкініш білдірген.
Сот отырысында жәбірленушілер мұндай жағдай бұрын да бірнеше рет болғанын алға тартып, құқықбұзушыға қатаң шара қолдануды сұрады.
Сот шешімімен ауыл тұрғыны кінәлі деп танылып, 15 тәулікке әкімшілік қамаққа алу шарасы қолданылды. Сондай-ақ, оған 3 ай мерзімге жәбiрленушiлерді iздестiруге, iзiне түсуге, оларға баруға, ауызша немесе телефон арқылы сөйлесуге және өзге де тәсiлдермен байланыс жасауға тыйым салу жөнінде ерекше талаптар белгіленді.
Сот қаулысы заңды күшіне енбеген. Дегенмен құқықбұзушы қамаққа алынып, сот белгілеген жазаны өтеуде.
