Түркістан облысында 200-ден астам дәрігер тапшы. Әсіресе өңірде бейінді мамандар арасында 258 маман: анестезиолог-реаниматолог, офтальмолог, лор, кардиохирург, травматолог, кардиолог, невропатолог, нефролог, онколог, патологоанатом, радиолог, неонатолог, жедел жәрдем дәрігері секілді кадрлар жетіспейді.
Тапшылықты жою мақсатында атқарылып жатқан жұмыстар мен «Дені сау ұлт» ұлттық жобасының орындалуы туралы Түркістан облысының әкімі Дархан Сатыбалдының төрағалығымен өткен апталық аппарат отырысында баяндалды.
“Ана мен бала денсаулығын сақтау, ауылдағы медицинаны жағдайды жақсарту, әлеуметтік маңызы бар ауруларды төмендету сияқты мәселелер аса маңызды. Ұлттық жобадағы жоспарларды жүзеге асыруға толық мүмкіндік бар. Медициналық көмектің сапасы мен қолжетімділігіне баса назар аудару қажет. Алдын алу жұмыстары бойынша халыққа түсіндірме жұмыстары дер кезінде жеткізу керек”, – деді облыс әкімі Дархат Сатыбалды.
Әкімдіктің мәліметінше, «Дені сау ұлт» ұлттық жоба аясында былтыр медициналық нысаны жоқ ауылдық елдімекендерде 11 медициналық пункт құрылысы жүргізіліп, пайдалануға берілген. 2023 жылға 16 нысанның құрылысы жоспарланған. Мәжілісте жас мамандарды жұмысқа тарту үшін дәрігерлерге қолдау көрсетіп, ынталандыру мәселесі талқыланды.
“Бүгінгі таңға облыс бойынша жалпы 24 597 медицина қызметкерлері бар. Оның ішінде 5 481 дәрігер 19 116 орта буынды медициналық қызметкерлер құрайды. Қазіргі таңда 258 бейінді дәрігерлерге деген тапшылық орын алуда. Оның бірден бір себебі – резидентурада оқыту мерзімінің ұзақтығы деуге болады. Тапшылықты жою мақсатында 2023 жылы жергілікті бюджет есебінен бірінші рет 60 грант бөлінді”,-деді облыстық денсаулық сақтау басқармасының басшысы Асхан Байдуәлиев.
Сонымен қатар жыл басынан бері ауылдық жерлер мен шалғай елдімекендердегі 240 мыңға жуық халыққа жылжымалы медициналық кешендер арқылы консультациялық-диагностикалық қызметтер көрсетілген. 2023 жылдың 6 айында 10 577 мүгедек балалар тіркеліп, оның ішінде 2 мыңға жуық бала оңалту орталықтарында емделген. 1 жасқа дейінгі балаларды проактивті бақылаумен және скринингтермен қамту 94,5%-ды құраған.
