Алматыда зейнеткерлерді сан соқтырып кеткен 62 жастағы әйел анықталды. Күдікті өзін әлеуметтік қызметкер ретінде таныстырып, қарттарға азық-түлік жеткізуге және қамқорлық жасауға көмектесуді ұсынып келген. Ал ақша алу механизмі қарапайым болған. Полицияға жәбірленушілердің бірі арызданған.
«Өзін әлеуметтік қызметкер ретінде таныстырған ол жәбірленушіге азық-түлік дүкеніне барып келуді ұсыныпты. Кейін зейнеткерден бірнеше рет ақша ауыстырып беруін сұрап, жиналған ақша қайда сақталғанын көрген. Сосын қолайлы сәтте 3 миллион теңгені ұрлап кеткен. Күдікті қазір қамауда. Ұрланған ақшаның бір бөлігі тәркіленді», – деді Бостандық аудандық полиция басқармасының бастығы Мақсат Қанапяев.
Қазіргі таңда сотқа дейінгі тергеу амалдары басталды. Күдікті бұған дейін осындай қылмыс жасағаны үшін жауапкершілікке тартылған. Оның басқа да қылмыстарға қатыстылығы тексерілуде.
