Отырар ауданы Сырдария өзенінде суға батқан бір әулеттің мүшелерін іздестіру жұмыстарына шымкенттік құтқарушылар жұмылдырылды. Соңғы дерек бойынша, қазіргі таңда 11 адамның 9-ының денесі табылды. Кәмелет жасына толмаған екі баланың денесін іздестіру жұмыстары жалғасып жатыр.
Шымкент қалалық ТЖД мәліметінше, жедел-құтқару жасақтың 6 құтқарушысы, 1 жүзу құралы және 1 техника 21 тамызда сағат 20.15-те жолға шығып, 22 тамызда сағат 00.10-да Отырар ауданы Көксарай ауылына жеткен. Шымкенттік құтқарушылар Сырдария өзенінде іздестіру-құтқару жұмыстарын таңғы сағат 07.00-ден бастап жүргізуде. Бүгін, 22 тамызда Шымкент қ. ТЖД жедел-құтқару жасақтан қосымша күш және құралдар жолданды.
Жалпы іздестіру жұмыстарына 150 адам, 18 техника, 2 дрон және 6 жүзу құралдары жұмылдырылған.
Еске салсақ, 21 тамыз күні кешкі уақытта Отырар ауданындағы Көксарай ауылына жақын жердегі Сырдария өзенінде 11 адамның суға батып кеткені белгілі болды. Олар ағайынды 4 отбасының мүшелері.
