Ақтауда ішімдік ішіп алған жүргізуші жолда тұрған қымбат алты автокөлікті соғып кетті. Оқиға сағат түнгі 01:30 шамасында №19 шағынауданында болған. Polisia.kz жазуынша, №35 үйге қарама қарсы жолда жеті автокөліктің қатысуымен жол-көлік оқиғасы болды.
Көлік құралын басқару құқығы жоқ Toyota Camry автокөлігінің мас жүргізушісі үй алдында бүйірлік қашықтықты сақтамай, Toyota Prado, Nissan Tiida, Kia Optima автокөліктеріне соқтығысқан. Бұдан кейін ол автомобиль жолына шығып, қозғалыссыз тұрған Honda Odyssey көлігін барып соққан. Спирттік ішімдік ішкен ер азамат мұнымен тоқтап қалмайды. Бұдан әрі кедергі туындағанын ескерместен жылдамдықпен барып Toyota Land Cruiser және инерция бойынша Toyota Camry автокөліктерімен соғылған.
Жол апатынан зардап шеккендер жоқ. Мас жүргізушіге ҚР ӘҚБтК-тің 608-бабы 6-бөлігі бойынша әкімшілік хаттама толтырылды. Ол қалалық әкімшілік соттың шешімімен 20 тәулікке қамауға алынды.
