Қарағандыда тұрмыстық жанжалға байланысты шақыртуға барған полиция қызметкерлері жеке үйден 5 келіден астам есірткі тәркіледі. Жанжал жеке үйлердің бірінде орын алған. Онда 55 жастағы үй иесі, оның 28 жастағы ұлы болған. Олардың барлығы Ресей Федерациясының азаматтары. Сонымен қоса ол үйге Грузиядан қонаққа келген 53 жастағы азамат болған.
«Оқиғаның мән-жайын анықтау барысында үйдегі бөлмелердің бірінен шарада тұрған жасыл түсті иісі бар өсімдік тектес зат табылған. Жедел жұмыстар барысында гараждан қара полимерлік пакетке салынған 4 дана қарасора сабақтары және есірткі заттарын пайдалану құралдары тәркіленді. Сараптама қорытындысына сәйкес, тәркіленген есірткі заттары жалпы салмағы 5 келі 200 гр «марихуана» есірткі заты екені белгілі болды» деп атап өтті Қарағанды полициясы.
Ұсталғандарға қатысты жүргізілген медициналық куәландыру барысында 28 жастағы азаматтың есірткі затын пайдаланғаны анықталған.
Аталған дерек бойынша Қылмыстық кодекстің 296 бабына сәйкес қылмыстық іс қозғалды. Тергеу амалдары жүргізілуде.
