Тамыз айында коронавирус инфекциясының орташа тәуліктік көрсеткіші 4 мың жағдайға дейін өседі. Бұл туралы Денсаулық сақтау министрі Ажар Ғиният Үкімет отырысында айтты. Министрдің айтуынша, ведомстваның сарапшылары эпидемиологиялық ахуалдың болжамын жасап, осындай тұжырымға келген.
«Вирустың ерекшілігін, денсаулық сақтау жүйесінің жүктемесін, аурудың таралуын ескере отырып, министрлік сарапшылармен бірге эпидемилогиялық жағдайдың болжамын жасады. Оған сәйкес, тамыз айында коронавирус инфекциясының орташа тәуліктік көрсеткіші 4 мың жағдайға дейін өседі. Ал қыркүйек айында төмендейді деп болжап отырмыз», — деді еліміздің бас дәрігері.
Бұдан өзге министр елімізде халықты вакциналау әрі ревакциналау үшін екпенің үш түрі барын жеткізді. Нақтырақ айтқанда, бүгінгі таңда екпенің 1 млн 350 мыңнан астам дозасы бар. Жылдың аяғына дейін үздіксіз иммунопрофилактиканы қамтамасыз ету үшін 500 мыңдай QazVac вакцинасын, ал балалар мен жүкті әйелдерге Pfizer вакцинасының 300 мың дозасын алу жоспарланып отыр екен.
