Түркістан облысы Түлкібас ауданындағы полицейлерге жергілікті тұрғын арызданған. Оның айтуынша, өзіне тиесілі бау-бақшасынан белгісіз біреулер 4 қап алма ұрлаған. Аталған жайт Қылмыстық кодекстің 187-бабы «Ұсақ-түйек жымқыру» бойынша тіркелген.
Хабар алысымен тәжірибелі полиция қызметкерлерінен тұратын жедел-тергеу тобы оқиға орнына шығып, тергеу амалдарын жүргізді. Күдікті көз ұазамай ұсталған.
Анықталғандай, күдікті өзінің басқаруындағы «Нексия» маркалы автокөлігімен күндізгі уақытта күзетшілердің жоқтығын пайдаланып, қапқа оралған 80 келі алманы жасырын түрде жымқырып кеткен. Келтірілген шығын көлемі 30000 теңге.
«Жәбірленушіге ұрланған алмалары қайтарылды. Ұсталған ер азаматтың бұдан басқа да ұрлық жайттарына қатысы бар-жоқтығы анықталып жатыр. Қазіргі таңда күдіктіге қатысты сотқа дейінгі тергеп-тексеру амалдары жүргізілуде» деп атап өтті облыстық Полиция департаментіндегілер.
