Түркістан облысы, Жетісай қаласында Toyota Camry көлігінің ішінде 5 жасар қыз бен шақалақ сәби қалып қойған. Бүлдіршіннің жылаған дауысын естіген тұрғындар дереу полицияға хабарлаған. Оқиға куәгері көлік ішінде қалып қойған балалар сыртқа шыға алмай қалғанын айтқан.
Polisia.kz дерегінше, оқиға орнына бірден шыққан полицейлер тиісті тексеріс жұмыстарын жүргізген.
Балалардың ата-аналары анықталып, жауап алынды. Ерлі-зайыптылардың айтуынша, олар диагностикалық орталыққа келіп, кезекке тұрып келу үшін балаларды көлікте қалдырыпты. Бұл аралықта 10 минут шамасында уақыт өткенін көрсеткен. Аталған жайт бойынша тәртіп сақшылары алдағы уақытта бұндай жағдайдың қайталанбауы үшін кішкентайлардың ата-анасына түсіндіру жұмыстарын жүргізді. Қазіргі таңда нәресте мен жасөспірім қыздың жағдайы жақсы. Ата-анасымен бірге.
