Шымкентте жеңіл көлік жүргізушісінің кінәсінен 600-ден астам үй көгілдір отынсыз қалды. Оқиға бүгін, 30 желтоқсанда таңғы сағат 05:31 шамасында Құрсай шағын ауданында болған. Opel Vectra жүргізушісі тізгінді басқара алмай, жоғары қысымды газ құбырына соғылған. Polisia.kz жазуынша, жол-көлік оқиғасының салдарынан 612 жеке тұрғын үй мен бір өнеркәсіптік кәсіпорын газсыз қалды.
Жүргізушіге қатысты Әкімшілік құқықбұзушылық туралы кодекстің 610-бабы (Көлік құралдары жүргізушілерінің жол жүру ережелерін бұзуы, көлік құралдарының немесе өзге де мүліктің бүлінуі) бойынша әкімшілік хаттама толтырылды. Жинақталған материалдар мамандандырылған сотқа жіберіледі. Автокөлік жүргізушісінен газ компаниясына келтірілген материалдық шығын сот тәртібімен өндірілетін болады.
