Бүгін, 21 тамыз күні Отырар ауданы Көксарай ауыл округіне қарасты Сырдария өзеніндегі көпірдің астында Көксарай ауылының тұрғындары суға батып кеткен. Оқиға отбасылық демалыс кезінде болған. Бұл туралы құтқарушыларға кешкі сағат 18-дер шамасында хабар келіп түскен.
Анықтау жұмыстары барысында 4 ағайынды отбасы мүшелерінің суға батқаны белгілі болған. Сырдария өзеніне демалуға барған азаматтардың жалпы саны – 20 адам. Соңғы мәлімет бойынша автокөлік көпірінің маңында 11 адам суға түсуге арналмаған жерде суға түсіп, батып кеткен.
“Оқиға орнына құтқару тобы, Түркістан облысы әкімінің екі орынбасары, Отырар ауданы әкімдігі, АПБ, ТЖБ қызметкерлері, еріктілер жедел жетті. Алдын ала мәліметтер бойынша өзеннен 6 адамның денесі табылды, 5 адам іздестірілуде” делінген облыс әкімдігі таратқан мәліметте.
Денесі табылған 6 адамның 5-уі ересектер, 1-уі кәмелет жасына толмаған бала. Соңғы келіп жеткен ақпаратқа сүйенсек, суға батып кеткен тағы 2 адамның мәйіті табылған.
Облыстық ТЖД-да жедел штаб құрылып, қауырт желі жұмыс жасауда 8-7253-357881. Оқиға орнына 144 адам, 16 техника, 6 жүзу құралы және дрон жұмылдырылды.
