Түркістан облысындағы «Қапланбек» кеден бекетінде ірі көлемде қауынды елге заңсыз өткізудің жолы кесілді. Бұл туралы Мемлекеттік кірістер комитеті хабарлады.
23 тамызда «Қапланбек» кеден бекетінде комитеттің Ахуалдық орталығының қызметкерлері инспекциялық тексеріп-қарау кешенінің суреттерін талдау кезінде мәлімделген құжаттарда сәйкессіздікті анықтаған. Құжатта жүк көлігіне артылған тауар қарбыз деп көрсетілген. Алайда суретте сопақша пішіндес тауар көрінген.
Ахуалдық орталығы кеден заңнамасын бұзуға күдік туындаған мәліметтерді кедендік жете тексеруге жіберген.
«Кедендік жете тексеруді жүргізу кезінде 62 тонна декларацияланбаған қауын тауары анықталды. Кедендік төлемдерді төлеуден жалтару мақсатында импорттаушылар декларацияларда неғұрлым арзан тауарды көрсетеді. Анықталған факт бойынша сыртқы экономикалық қызметке қатысушы қолданыстағы заңнамамен жауапкершілікке тартылатын болады»,- деп атап өтті комитеттегілер.
